قصة سيدنا الياس عليه السلام كامله باللغه العاميه بقلم هبه الله
سمعت قبل كدة عن نبي اسمه " إيليا " !؟
= إيليا !!
اه ،، وموجود اسمه في التوراة كمان!
= اه مش مذكور في القرآن يعني !!؟
لأ مذكور في القرآن !!
بس في القرآن مااسمهوش " إيليا " ..
أُمال اسمه إيه
اسمه " إلياس عليه السلام " ..
أُمال إيه إيليا ده !!؟
دول بني إسرائيل كانوا بينادوه بيقولوله يا إيليا ،،
و إلياس كان من نسل مين !؟
من نسل هارون عليه السلام..
إلياس كان نبي..
طبعا الأنبياء في بني إسرائيل من بعد سيدنا موسي كانوا بيجددوا إحياء شريعة موسى ويذَكّروا بيها الناس،فربنا أرسل النبي إلياس كرسول لبني إسرائيل..
"وَإِنَّ إِلْيَاسَ لَمِنَ الْمُرْسَلِينَ.."
ليه بقي !؟
لأن بعد ما يوشع والأنبياء إللي بعده ماتوا ، بني إسرائيل عبدوا تاني الأصنام .
بس المرة دى كانوا بيعبدوا صنم اسمه بَعْل،،!
"أَتَدْعُونَ بَعْلًا وَتَذَرُونَ أَحْسَنَ الْخَالِقِينَ"
فبدأ سيدنا إلياس يدعوهم لعبادة ربنا وحده الخالق الرازق..
فضل يدعي قومه بكل الأساليب، بالترغيب والترهيب وبالحسنى زيه زي باقي الأنبياء اللي قبله ،،
"اللَّهَ رَبَّكُمْ وَرَبَّ آبَائِكُمُ الْأَوَّلِينَ" ،
طبعا اكيد بني إسرائيل دوخوه ,,
دوخوه !!!
لأ دول كدبوه!
رغم كل التعب اللي تعبه في دعوته معاهم إلا انهم برضو مااستجابوش ليه ..
"فَكَذَّبُوهُ فَإِنَّهُمْ لَمُحْضَرُون".
فربنا وعدهم بعذابهم يوم القيامة ،،ومش هيهلكهم في الدنيا ومش هيعذبهم زي اللي قبلهم..!!!
ووعد الناس إللي اتبعوا إلياس عليه السلام بالثواب يوم القيامة،، ومدح عز وجل إلياس عليه السلام وإنه لم يُقَصِّر في دعوته،،
فَإِنَّهُمْ لَُمحْضَرُونَ ،، إِلاَّ عِبَادَ اللهِ الْمُـخْلَصِينَ ،، وَتَرَكْنَا عَلَيْهِ فِى الاَْخِرِينَ ،، إِنَّا كَذَلِكَ نَجْزِى الْمُـحْسِنِينَ ،، إِنَّهُ مِنْ عِبَادِنَا الْمُؤْمِنِينَ
بس إيه الحكمة ان ربنا مايعذبهمش في الدنيا ، ويبقي عذابهم في الآخرة بس !!؟
لما بتكون مظلوم بيبقي نفسك ربنا يجيبلك حقك في الدنيا لأنك شايف ان ازاي واحد ظالم بيفتري علي الناس وبياكل حقوقهم ،، صح !؟
وممكن كمان تلاقيه عايش حياته بيعمل اللي هو عايزه،، ومش بس كدة دة عنده فلوس الدنيا وربنا بيوسعها عليه اكتر ويغنيه ،، وعنده أولاد ومنصب عالي وكل النعم الحلوة دي !!
طب ازاي كدة !
ليه ربنا ما انتقمش منه في الدنيا ويشفي قلوبنا !؟
مش أنت بتشوف كدة !؟
أهو الحكمة بقي إن ربنا بيقولنا مش لازم تشوف هلاك الفاجر أو الكافر أو الفاسق أو الظالم في الدنيا!!
ليه !؟
لانه هيشوف أيام سودة في الآخرة ،و يا ويله يا سواد ليله !
وربنا هو اللي وعدنا بكدة ..
"وَلَا يَحْسَبَنَّ الَّذِينَ كَفَرُوا أَنَّمَا نُمْلِي لَهُمْ خَيْرٌ لِّأَنفُسِهِمْ ۚ إِنَّمَا نُمْلِي لَهُمْ لِيَزْدَادُوا إِثْمًا ۚ وَلَهُمْ عَذَابٌ مُّهِينٌ "ف متفكرش إن الناس دي ربنا سايبهم كده على كفرهم وظلمهم ،و إن دي حاجة كويسة ليهم،!
لأ ده سايبهم عشان كل مايزدادوا في الطغيان كل ما عذابهم هيزيد،، وطبعا في المقابل المؤمنين إللي بيتعرضوا للظلم أجرهم هيزيد،، فمش لازم تقعد وتستني وتتعب في نفسك عشان تشوف هلاك الظالم بعينك..
وصدق اللي قال فعلا يا بخت من بات مظلوم مابتش ظالم،،
سيدنا إلياس
